Torre de Amarante

lunes, 14 de octubre de 2013

O PSdeG de Antas reclama ó alcalde que “cumpra a palabra dada” e disolva a empresa pública Épica “dada a súa inutilidade”

Os socialistas lamentan “a falta de rigor” de Varela ó rexeitar todas as súas alegacións ás contas xerais de 2012, incluídas as relacionadas coa contratación de dous servizos municipais a familiares próximos do goberno local, “sen basearse nun informe técnico elaborado pola secretaría”   

O PSdeG de Antas de Ulla reclamou no pleno celebrado na mañá deste luns que o Goberno local do PP “cumpra a palabra dada” e disolva a Empresa de Promoción Integral de Antas (Épica), de titularidade municipal, dada a súa “inutilidade, pois non cumpre ningunha función, e os resultados económicos negativos que presenta”. Os socialistas lembran que o alcalde comprometeuse a primeiros deste ano a pechar a sociedade mercantil na pasada primavera, “algo que non cumpriu”, e ante as explicacións que lle pediron na sesión plenaria de hoxe, “deunos largas e escusas pouco fundamentadas”, polo que “lle esiximos que mire polos intereses dos veciños e acabe por desfacerse desta entidade inútil”, subliñou a voceira municipal, Pilar García Porto.    

A Conta Xeral de Épica correspondente a 2012, na que se reflicte a situación económica da empresa, foi un dos asuntos abordados hoxe pola corporación de Antas, así como o estado de contas do Concello en xeral, tamén referido ó pasado ano. García Porto lamentou a “falta de rigor” do alcalde por rexeitar todas as súas alegacións a estes documentos contables, incluída a contratación de dous servizos municipais a familiares próximos ó goberno local, “sen avalar as súas manifestacións cun informe técnico elaborado pola Secretaría municipal, algo sorprendente que volve a demostrar a súa nefasta xestión e descontrol”.

A voceira socialista tamén esixiu “máis transparencia nas contas, que nos permita cumprir co noso papel de fiscalización do traballo do Concello e comprobar a execución real dos orzamentos, pois a documentación presentada está incompleta, faltan facturas e non temos todos datos en canto a investimentos reais”.

A necesidade de axilizar o PXOM
O PSdeG aproveitou o pleno para demandar ó executivo do PP que axilice a elaboración e tramitación do Plan Xeral de Ordenación Municipal (PXOM), “que aínda está nos primeiros pasos”, co obxectivo de favorecer “o normal desenvolvemento urbanístico de Antas, que hoxe se sigue rexendo por unhas normas subsidiarias obsoletas da década dos 70, pero tamén para aforrar cartos ós veciños cando para unha obra teñen que realizar unha delimitación en solo rural”. Os socialistas fixeron este chamamento no punto no que se debateu a aprobación provisional da modificación do proxecto da delimitación de solo do núcleo rural de Vilane.

“Ó PP non lle importan os problemas dos veciños”
Por outra banda, subliñou García Porto, o grupo municipal do PP “fixo gala de novo do seu despotismo e falta de interese polos problemas reais dos veciños” ó negarse a debater unha moción presentada polos socialistas na que lle pedían  ó Concello que atenda varias demandas dos residentes na parroquia de Barreiro: eliminar os vertidos da depuradora e trasladala a outra localización; reparar os accesos á aldea, as vías de concentración parcelaria, e as pistas danadas coa construción da propia depuradora; e construír unha traída de auga con capacidade suficiente para que chegue a tódolos fogares.

Información sobre o plan de bacheo e o obradoiro
Por outra banda, a voceira espera que o alcalde cumpra, “esta vez si”, o compromiso expresado no pleno de entregarlles unha lista das obras acometidas co plan de bacheo de estradas municipais anunciado por Varela o pasado ano, así como unha relación dos traballos realizados polo obradoiro de emprego I Ulla-Miño, que compartiron Antas, Portomarín, Palas de Rei e Taboada. O PSdeG quere coñecer con exactitude as actuacións executadas a través da ambas iniciativas “polos indicios de deixamento e irregularidades” que detectaron.

O PSdeG de Antas denuncia a “falta de ética” do PP por contratar servizos municipais a familiares próximos do alcalde e unha edil

“O Concello paga por asistencia xurídica a un parente de Javier Varela” e a contratación das pólizas aseguradoras “foi para o marido da concelleira do goberno local con dedicación exclusiva", unha situación que os socialistas critican nas alegacións á Conta Xeral de 2012 que debaterá o pleno o luns

Subliñan que este documento contable demostra “a desastrosa xestión económica” do rexedor, pois “constatamos que faltan facturas, e que hai retrasos inxustificados no abono do servizo de recollida de lixo. Ademais neste 2013 ten facturas sen pagar ós provedores por valor de 1 millón de euros”

O PSdeG de Antas de Ulla considera “unha total falta de ética e de dubidosa legalidade” a contratación por parte do goberno local do PP de dous servizos municipais a familiares moi próximos do alcalde e unha concelleira, sen telos sacado a concurso público. O Concello, “con cartos de tódolos veciños”, págalle por asesoramento xurídico dende hai xa varios anos a un parente de Javier Varela, unha situación que, “ademais do amiguismo que denota, é moito máis grave, pois o Concello pode ter totalmente gratis asistencia xurídica da Deputación de Lugo”, explica a voceira municipal, Pilar García Porto. Por outra banda, a contratación das pólizas aseguradoras municipais “foi para a empresa do marido da edil do goberno con dedicación exclusiva”, unha decisión que tamén pon de manifesto para os socialistas que o PP “pon a alcaldía ó servizo de intereses de amizade, en lugar de procurar as mellores prestacións para os veciños, pois o correcto sería sacar estes contratos a concurso en aras da transparencia, a igualdade de oportunidades e mellor xestión, en lugar da contratación a dedo”.

Ambos casos, “dende logo reprobables eticamente, pero tamén dubidosamente legais”, centran parte das alegacións que o Grupo Municipal do PSdeG de Antas presentou á Conta Xeral de 2012 que debaterá o pleno o vindeiro luns. Este documento contable debe reflectir a realidade económica do Concello ó peche do ano, como executou o orzamento, canto gastou e canto ingresou, ou as débedas que acumula.

Neste senso, Pilar García Porto, tamén deputada provincial de Economía, Recadación e Facenda, recalcou que o expediente, “ademais de amiguismo”, demostra “a desastrosa xestión económica do alcalde”. “Constatamos que faltan facturas; que non se fai unha xestión eficiente dos recursos públicos, pois, por exemplo, contrátanse servizos xurídicos que  se podían tres gratis, ou traballos no alumeado público que os podería facer persoal municipal; e houbo retrasos no abono do servizo de recollida de lixo, pois a 31 de decembro, había pendentes de pago 35.000 euros, algo inxustificado, porque os usuarios tiñan pagado escrupulosamente ó Concello as correspondentes taxas e estes cartos non poden ter outro destino máis que o de abonar a recollida de lixo”. Ademais, o Concello ten pendentes de pago 1 millón de euros en facturas a provedores, como consta no Orzamento municipal deste 2013.
Convocatoria irregular

Outra das alegacións presentadas polo PSdeG ten que ver coa convocatoria da comisión informativa municipal para tratar este documento, que se celebra previamente ó pleno e tivo lugar a principios de setembro. A voceira lembrou que o alcalde “saltouse de novo as regras democráticas” ó convocar a xuntanza de xeito “irregular, sen respectar os prazos mínimos esixidos pola lei, unha vulneración dos nosos dereitos e unha falta de respecto ós veciños inaceptable”, pero “nin moito menos a única”, xa que “fixo o mesmo en marzo co pleno de aprobación dos Orzamentos deste 2013, que adiantou unha semana sen avisar cos dous días de antelación requiridos”. García Porto lembrou que o Valedor do Pobo admitiu a trámite a reclamación que lle fixo o grupo socialista e os nacionalistas pola actuación do rexedor no caso da sesión plenaria de marzo.

lunes, 12 de agosto de 2013

O PSdeG de Antas ve “sen garantías” os fondos por 3,4 millóns de euros para a residencia e a traída de augas

Os socialistas critican que os orzamentos municipais están “inflados con cifras irreais non comprometidas pola Xunta”, e lamentan que a débeda municipal a proveedores sexa de case un millón de euros, “o dobre do que recoñecera o alcalde, que segue amosando unha absoluta falta de transparencia”

O PSdeG de Antas votou, no pleno de xuño, en contra da aprobación definitiva dos orzamentos municipais, dun total de cinco millóns de euros, que saíron adiante cos votos a favor do PP e a abstención dos nacionalistas. Os socialistas critican que as contas inclúen dúas partidas importantes, unha de 2,8 millóns de euros para a ampliación da residencia da terceira idade, e outra de 600.000 euros para a traída de augas, que só son “unha cortina de fume ata as próximas eleccións municipais” e son investimentos “sen garantías” que non contan coa aprobación da Xunta, non aparecen nas contas autonómicas e en ningún casos serán executadas neste exercizo, polo que o goberno local presenta uns orzamentos “inflados con cifras irreais”, segundo explica a voceira do PSdeG, Pilar García Porto. Sen estes proxectos “no aire”, os investimentos do concello redúcense nuns 10.000 euros con respecto a 2012.

Débeda
A socialista lamenta asimesmo “a situación de endebedamento do municipio, moi lonxe do que di o alcalde”, cunha débeda a proveedores de case un millón de euros -929.181 euros- a 1 de xaneiro de 2013, “o dobre do que dixera o alcalde, que recoñecera 590.000 euros, nunha nova mostra de absoluta falta de transparencia”. Ademais, o Concello ten que amortizar este mesmo ano case 20.000 euros dun crédito e ten pendentes devolucións ao Estado por case 85.000 euros dos anos 2008 e 2009. García Porto destaca ademais que a contención do gasto corrente “da que presume o Concello” (7.000 euros) non chega nin ao 1% do total.

Sen resposta ás alegacións e sen cumprir prazos
Por outra banda, a voceira do PSdeG denuncia que “non houbo contestación nin hai constancia de ningún informe técnico” ás alegacións aos orzamentos presentadas polos socialistas, e que o alcalde “limitouse a rexeitalas no mesmo pleno”. Os socialistas lembran ademais que  son os segundos orzamentos aprobados no concello desde 2004, e que tanto os de 2012 como os de 2013 “foron aprobados fóra do prazo legal”. Tamén lembrou que pleno para a aprobación inicial foi convocado sen prazo suficiente, polo que “todo o proceso careceu dun mínimo de garantías democráticas para a oposición”.

Sen axudas a colectivos sociais
Por último, García Porto lamenta que “as subvencións a colectivos sociais con moita actividade no Concello”, como o das festas parroquiais ou a Sociedade Deportiva de Antas, “non se actualizan desde o ano 2004”, polo que “a iniciativa social do municipio non recibe apoio desde goberno”.

miércoles, 7 de agosto de 2013

O PSdeG de Antas esixe que o Concello atenda as peticións dos veciños e repare os accesos a Casadenaia


Os socialistas denuncian o “grave deterioro dos viais” e preguntan “onde van os 200.000 euros prometidos polo alcalde para a mellora das rúas”, e piden o arranxo dunha canalización de auga con fugas tras a denuncia dos afectados

O PSdeG de Antas esíxelle ao goberno local que “repare dunha vez por todas as rúas de acceso” na parroquia de Casadenaia que son de titularidade municipal, e que atenda as queixas dos veciños “que xa presentaron reclamacións por escrito en varias ocasións sen obter resposta” polas deficiencias en Casadenaia, Aboi, Suar e Fondevila (todas pertencentes á parroquia). 

A voceira socialista, Pilar García Porto, critica o “grave deterioro” dos viais e pregunta “onde van os 200.000 euros que prometeu o alcalde para a mellora e reparación da vías”, unha partida pola que se interesaron xa en dúas ocasións no pleno sen obter explicacións. Unha das reclamcións dos veciños e veciñas é a reparación dunha canalización de auga en Casadenaia que ten fugas e mantén o camiño “sempre mollado e con aspecto de barrizal, coas consecuencias que isto ten para os veciños e para o propio mantemento das infraestruturas”. García Porto lembra que esta obra “foi anunciada e feita a toda présa xusto antes das eleccións, e agora debe ser que xa non importa como quedase”. A socialista indica que “os únicos accesos decentes no Concello sexan as vías provinciais, mentres o Cgoberno local promete e non fai nada”


martes, 23 de julio de 2013

O PSdeG de Antas pídelle ó Concello o expediente da concesión do quiosco da piscina “ante as evidentes mostras de que o está a explotar o tesoureiro municipal”

Os socialistas criticamos que este funcionario formara parte da mesa de contratación do posto de bebidas xa que agora “resulta obvio, como todos os veciños poden comprobar, que está a traballar nel, xunto coa súa parella”

Advirten de que farán “todo o que sexa necesario para garantir a legalidade do procedemento e defender os intereses dos veciños”


Dende o PSdeG de Antas de Ulla requerímoslle ó Concello o expediente completo de licitación e concesión do quiosco de bebidas situado na piscina da localidade ante “as notorias mostras de irregularidades cometidas neste proceso”. Neste senso, a nosa portavoz municipal , Pilar García Porto, explicou que, “como resulta evidente, e así o poden comprobar os veciños de Antas tódolos días, o tesoureiro municipal está a traballar o quiosco coa súa parella, pero non só iso, este funcionario formou parte como vogal da mesa de contratación na que se adxudicou este servizo, tal e como figura no decreto da Alcaldía para a aprobación do expediente de contratación, con data do 22 de maio”. Deste xeito, “pode darse o caso de que na mesa de contratación na que tomou parte este traballador municipal lle fose outorgado o quiosco a el mesmo, ou a alguén da súa familia”, asegurou a concelleira.

Ante esta situación “totalmente escandalosa e presuntamente ilegal”, García Porto solicitará ó Concello toda a documentación sobre o procedemento co fin de “comprobar todas as posibles irregularidades existentes”. A portavoz  subliñou, deste xeito, que, unha vez revisado o expediente, “faremos todo o posible, sen descartar ningunha acción, para garantir a legalidade e defender os intereses dos veciños ante as tropelías do Goberno local, pois para calquera veciño pode ser moi atractivo optar á concesión deste posto, teña un negocio hostaleiro ou non”.





lunes, 27 de mayo de 2013

O PSdeG de Antas esixirá de novo no pleno as melloras e o aforro no alumeado tras os continuos apagóns no Concello

Dende o PSdeG de Antas insistiremos no próximo pleno municipal en esixir “unha solución de
inmediato” para os continuos apagóns que sufre o Concello, despois de que fai un par de semanas un novo fallo no alumeado público deixara sen luz unha boa parte do casco urbano e estes problemas se repitan de xeito periódico en aldeas como Castro de Amarante. “Isto é un
desastre de xestión, polo que pediremos que dunha vez arranxen esta situación insostible
que fai parecer que en Antas por momentos, vivimos no século pasado”, os socialistas levamos xa cinco anos reclamando melloras nas instalacións.

O último apagón do alumeado público afectou a zonas céntricas como o colexio, o cuartel ou
a carretera de Santa Mariña. “Isto repítese con frecuencia no casco urbano, con casos
graves como a última Festa da Xuventude, con repercusións económicas para a hostalería ou
un maior risco de accidentes pola acumulación de xente, sen falar da imaxe que damos ante
as persoas que nos visitan”, critican os socialistas, que destacan “o risco tamén nas aldeas, con carreteras con moito tráfico e escasa visibilidade e con casas nos marxes da calzada”.

Os socialistas vimos reclamando desde hai cinco anos que se fagan reformas no alumeado público con dous fins: por unha banda mellorar as instalacións, “nas que hai cadros públicos abertos e incluso sen tapa, e hai aldeas nas que ata hai pouco tempo os veciños encendían e apagaban o alumeado público”, e por outro lado diminuír cun plan de aforro “os elevadísmos consumos eléctricos que disparan as facturas”.


Despilfarro enerxético e falta de transparencia
Lembramos que o Concello de Antas rexeitou sumarse ao plan da Deputación
provincial para realizar auditorías enerxéticas que suporía un 20% de aforro nas facturas da
luz, e que na liquidación de 2011, o Concello presentou facturas para o mantemento do
alumeado por importe de 25.000 euros entre materiais e man de obra contratada cun
terceiro, “cando o Concello conta con man de obra cualificada para estas tarefas, tal e como
se fixo sempre ata ese ano”. Isto constitúe “un gasto innecesario e inexplicable, a non ser
que teña fins electoralistas”, critica a socialista, que incide en que estas facturas e
documentos “non especifican en ningún caso a finalidade e o destino do gasto”, tal e como
fixemos constar nas alegacións presentadas ás contas municipais.

miércoles, 15 de mayo de 2013

O PSdeG de Antas presentará propostas para reducir custos na Feira do Queixo e na Festa dos Maiores


Os socialistas rexistraremos na alcaldía medidas para “aforrar e aumentar a transparencia da contratación” en dúas celebracións “moi importantes para a promoción do Concello e positivas a nivel social e económico”

O PSdeG de Antas anuncia que rexistrará varias propostas na alcaldía do Concello para “reducir custos e aumentar a transparencia da contratación” na Feira do Queixo e na Festa dos Maiores, dúas celebracións “moi importantes para a promoción do Concello e positivas a nivel social e económico” pero que “poden mellorar no referente á súa xestión económica”.

Así, no caso da Festa dos Maiores, os socialistas reclamamos que o Concello pida orzamento a tres empresas distintas para cada unha das contratacións (regalos, comida...) para “que o proceso sexa transparente, obter o mellor custo posible e evitar contratos a dedo”. No referente á Feira do Queixo, que é unha celebración rotatoria entre Antas, Palas e Monterroso que este ano acolle Antas, desde o PSdeG pedimos que haxa unha “redución de gastos na comida oficial” e que en lugar de invertir en carpas individuais para cada posto, o Concello aproveite a praza cuberta que hai no municipio “e na que se gastou unha importante cantidade de cartos” para facer a celebración dentro e nas rúas de arredor cunha única carpa máis grande e menos custosa que as individuais.

“A Feira do Queixo é un importante impulso para os produtos da zona, e a Festa dos Maiores supón unha xornada de encontro para que gocen os veciños e veciñas de máis idade, polo que deben potenciarse pero á vez realizar unha xestión responsable dos cartos públicos”, afirma a voceira socialista, Pilar García Porto, que lembra asimesmo a “opacidade nos orzamentos municipais para coñecer os gastos destas celebracións”.

Supresión do Primavera Sons e apoio a colectivos sociais do municipio
Por outra banda, desde o PSdeG reclamamos a supresión do Festival Primavera Sons, que organizou o Concello en 2011 e que supuxo un gasto de 12.000 euros cunha afluencia practicamente nula. Os socialistas reclamamos que estes cartos “sexan destinados a apoiar as actividades doutros colectivos sociais do municipio”, como a Festa da Xuventude ou o festival da Asociación Cultural Fiadeira, así como a banda de música, que conta cunha escola municipal, ou a coral polifónica. “Apostamos por apoiar e potenciar o que xa temos, para que non se perda, e non gastar noutros inventos”, afirma García Porto.

O PSdeG de Antas denuncia que o Concello incumpre a lei de protección de animais tras a morte dun can extraviado


Os socialistas esixiremos no pleno que o goberno local cumpra a normativa autonómica e asine un convenio cunha protectora ou ben constrúa unhas instalacións adecuadas, e lamentan “a desidia e falta de responsabilidade do equipo de goberno” tras recibir a alerta veciñal, “algo que xa pasou máis veces”

Dende o PSdeG de Antas denunciamos que o Concello incumpre a lei da Xunta de Galicia para a protección dos animais, despois de comprobar que “non ten un convenio asinado coa Sociedade Protectora de Animais e Prantas de Lugo nin tampouco conta con instalacións propias para atender e albergar animais e dar resposta a estes problemas no término municipal, tal e como esixe a normativa autonómica”. Os socialistas levaremos este asunto ao próximo pleno tras realizar estas comprobacións, despois de que os responsables locais non responderan á alerta veciñal polo estado dun can extraviado con collar que finalmente morreu “pola desidia e falta de responsabilidade do equipo de goberno”.

Os socialistas apuntamos que a pasada semana, un veciño de Antas atopou un can ferido que non era capaz de moverse nun terreo próximo á aldea de Vilaboa, xunto a unha propiedade municipal na que está ubicada a fosa de decantación dos residuos urbanos. “Este veciño avisou á Garda Civil, que lle indicou que o responsable nestes casos é o Concello. Nese momento puxo este feito en coñecemento do tenente de alcalde, pero ao día seguinte comprobou que non fixeran nada e o can estaba morto. Non estaba abandoado, porque tiña collar”, explica a nosa voceira, Pilar García Porto.

“Como era fin de semana e o Concello estaba pechado, ese día avisou de novo por teléfono, e ao non presentarse ninguén, púxose en contacto coas autoridades do SEPRONA, que lle explicaron de novo que a responsabilidade era do Concello”, di a socialista. García Porto explica que ante estas situacións os concellos poden actuar de dúas meneiras para cumprir coa lei: “Ou ben asinando un convenio cunha protectora de animales para que actúe ante un caso así, ou cun lugar acondicionado para albergar estes animais e atendelos”, algo que no caso de Antas non sucede.

No próximo pleno, os socialistas presentarán unha iniciativa para que “o Concello rubrique un convenio coa sociedade protectora ou con outro terceiro, ou ben para que se constrúan os espazos necesarios para coidar os animais abandonados ou extraviados” no municipio. “En épocas de caza ou próximas é frecuente atopar cans desorientasdos polas rúas ou cunetas”, lembran os socialistas, que lamentan que “non é a primeira vez que algo así se pon en coñecemento do Concello”, e destacan que “para os veciños supón unha responsabilidade e un risco atender un animal sen dono”. Desde o PSdeG indican tamén que “moitas veces os propios propietarios non atopan os animais que se extravían porque non teñen un lugar concreto de referencias para recollelos, e caban sucedendo estas cousas”.



jueves, 25 de abril de 2013

O Valedor admite a trámite a queixa en Antas pola posible “ilegalidade” na convocatoria do pleno dos orzamentos

A oposición puxo unha reclamación hai un mes ante o Valedor do Pobo por non ter o tempo que marca a normativa para poder analizar as contas públicas
 
O PSdeG vén de rexistrar ademais varias alegacións aos orzamentos, entre elas o incumprimento de prazos, a falta de información sobre subvencións otorgadas ou o rexistro como ingresos de axudas que aínda non foron concedidas
 
O Valedor do Pobo vén de admitir a trámite a reclamación do grupo socialista de Antas e dos nacionalistas pola posible convocatoria “ilegal” do pleno do pasado mes de marzo realizada polo alcalde, o popular Javier Varela, que adiantou a data unha semana sen avisar cos dous días hábiles de antelación que marca a normativa. No pleno, lembran os socialistas, debatíanse temas “de moita relevancia para o municipio”, como a aprobación inicial dos orzamentos municipais de 2013, a aprobación definitiva das contas de 2012 ou a modificación dos estatutos e os membros do consello de administración da polémica empresa municipal Épica. Toda a oposición abandonou o pleno hai un mes ante a “falta de información e o escurantismo” do goberno local, que non deu tempo a revisar a documentación para poder debater sobre as contas públicas.
 
Alegacións do PSdeG aos orzamentos
Por outra banda, o PSdeG vén de rexistrar en tempo e forma alegacións aos orzamentos municipais. En ditas alegacións reflíctese tamén a posible “ilegalidade” na convocatoria do pleno de marzo para a aprobación inicial dos orzamentos, e recóllense asimesmo outras presuntas “irregularidades” nas contas, entre elas a presentación dos orzamentos fóra do prazo establecido , que tiña como data límite o pasado 12 de abril, ou a “falta de información” sobre as subvencións. Os orzamentos municipais só recollen dúas subvencións concedidas á Sociedade Deportiva Antas e ás festas parroquiais, e os socialistas reclaman que se recollan todas as axudas a asociacións e entidades “nominalmente”, para asegurar “a transparencia e os criterios obxectivos na concesión de subvencións”, como explica a voceira do PSdeG no concello, Pilar García Porto.
 
A outra reclamación dos socialistas no apartado de subvencións refírese aos ingresos reflectidos nos orzamentos. Neste punto, o Concello calcula os ingresos tendo en conta as subvencións xa concedidas pero tamén as que son previsibles e aínda non están concedidas e incluso as que só están solicitadas. “Cremos que isto non é serio e que pode falsear as contas municipais, polo que reclamamos que o goberno local se centre en rexistrar os cartos que xa están oficialmente recoñecidos”, apunta García Porto.

jueves, 21 de marzo de 2013

A oposición ao completo abandona o pleno de Antas tras a convocatoria “ilegal” realizada polo alcalde

Xa presentamos unha queixa por escrito diante do Valedor do Pobo, e estamos pendentes do informe da Secretaría municipal

O grupo socialista de Antas e os nacionalistas abandonamos esta mañá o pleno de Antas de Ulla pola convocatoria “ilegal” realizada polo alcalde, o popular Javier Varela, que adiantou a data unha semana sen avisar cos dous días hábiles de antelación que marca a normativa. A situación é “aínda máis grave” porque no pleno se debatían temas “de moita relevancia para o municipio”, como a aprobación definitiva das contas de 2011, a aprobación inicial dos orzamentos municipais de 2013 ou a modificación dos estatutos e os membros do consello de administración da polémica empresa municipal Épica. Os membros da oposición critican que o goberno local non lles deu tempo para poder comprobar a documentación. “De novo o goberno do PP xoga coa falta de información e o escurantismo para facer e desfacer ao seu xeito, sen o mínimo sentido democrático, o que á súa vez é unha falta de respecto aos veciños e veciñas de Antas".

Presentamos antes do pleno a posibilidade de invalidar a convocatoria e volver a realizala ou o aprazamento e retirada dalgúns puntos. O alcalde negouse, e argumentou que os iban aprobar igual por ter a maioría absoluta, “nunha mostra do tipo de política déspota que fai o PP”. O rexedor propuxo, pola súa banda, seguir co pleno e incluir estes puntos no futuro para debatelos. “Quere que debatamos algo despois de estar xa votado e aprobado en pleno cunha convocatoria que el sacou da manga dun día para outro, cando o que hai que arranxar é que nos dean a posibilidade de coñecer os documentos para poder votar dun xeito coherente".

A oposición presentou unha queixa por escrito diante do Valedor do Pobo. Ademais, antes do pleno, O PSdeG envioulle un escrito ao alcalde que foi ignorado, e outro á Secretaría municipal para emitir un informe sobre a convocatoria do pleno, que están pendentes de recibir.

 


 

 

 

martes, 8 de enero de 2013

O PSdeG de Antas celebra que a Deputación invista na traída de auga, “unha demanda histórica” no concello


O grupo socialista está “moi satisfeito” de que o ente provincial asuma a obra ao 50% despois de que o Goberno Central deixara sen dotación a gran parte do Plan de Obras e Servizos, agardan que este sexa “o primeiro paso” para dotar de auga potable a todo o concello e lémbranlle ao PP que “hai moito que facer”

O Grupo municipal socialista de Antas de Ulla mostrase “moi satisfeito” co investimento realizado pola Deputación de Lugo na traída do concello, cunha obra prevista de “substitución parcial da rede de abastecemento de auga” e que vén a arranxar en gran parte o que xa era “unha demanda histórica” do PSdeG no concello e “unha necesidade para os veciños e as veciñas de Antas”. Despois de que o Goberno Central deixara sen dotación económica a parte do Plan de Obras e Servizos (POS), cun recorte de 2,7 millóns de euros na provincia de Lugo, a Deputación Provincial decidiu continuar adiante co POS aportando a súa parte e dándolle a posibilidade aos concellos de aportar ao 50% para continuar realizando obras na provincia.

”Ao longo de cinco anos presentamos numerosas iniciativas e reclamacións ao alcalde, xa que a rede está completamente deteriorada”, afirma a voceira socialista no concello, e engade que “as averías e roturas de tuberías son numerosas, e no verán prodúcese desabastecemento de auga potable, ademais de que as tuberías son de fibrocemento e hoxe xa non están autorizadas para uso sanitario pola súa toxicidade”. Este proxecto comprende a substitución parcial da rede de abastecemento de auga potable no casco urbán, concretamente no Camiño de Vilasión, e comprende o traxecto desde los depósitos de acumulación ata o Camino de Vilasión e posteriormente a súa continuación ata o encontro coa  rede de distribución na Rúa Nova. A financiación do orzamento, que ascende a 26.313,72€, será asumida no 50% pola Deputación e no 50% restante polo concello.

En palabras dos concelleiros socialistas “trátase duhna actuación necesaria e urxente que garantizará un abastecemento que cumpra coas normas sanitarias vixentes, pero insuficiente para satisfacer as necesidades actuais do núcleo urbano de Antas de Ulla, xa que a traída está deteriorada en moitos máis puntos e tamén as tuberías son de fibrocemento noutros tramos”. Neste sentido, lémbranlle ao PP que “hai moito que facer, e habería que empezar por ter en condicións os tanques do Monte Farelo que permanecen abertos e sen control todo o ano permitindo o acceso de animais ou persoas ao seu interior, tal e como denunciamos en numerosas ocasións, e habería que solucionar os problemas de abastecemento”. Así, critican que o Goberno Central destinase arredor de 600.000€ para a construcción dun tanque que non existe, e engaden que “hai moitas aldeas que aínda non teñen traída e outras nas que non funciona, como foi o caso de Olveda” este pasado verán. ”Agardamos que este sexa o primeiro paso para dotar de auga potable á poboación de todo o Concello e sentímonos orgullosos de que dende a Deputación se contribúa a dar solución a este vello problema dos veciños de Antas”, conclúen.